Хятадын Хэнань мужийн иргэн Хуан Жунмин бол дэлхий дээр саяд сайндаа л тав тохиолдох ховор эмгэгтэй төрсөн хүн. Түүний зүрх хүмүүсийнх шиг цээжнийхээ зүүн хэсэгт биш харин гэдсэндээ байрласан гэнэ. Тэгэх тэгэхдээ бүр арьсныхаа цаахна болохоор амьсгалахад хүндээс гадна, багахан доргих, цохихыг андахгүй мэдэрдэг их эмзэг байжээ. Багад нь эмч нар ч удаан амьдрахгүй гэж хэлсэн байна. Тэгээд эцэг эх нь түүний бусад хүүхдүүдтэй ч  тоглуулахгүй энхрийлдэг байж.  
Гэхдээ л түүнд мэс засал хийхэд төлөх мөнгөгүйгээс энэ хэвээрээ явсаар өнөө хүрсэн байна. Ингээд хэвлэл мэдээллийн хэрэгслээр зар цуу болсны эцэст түүнд мэс засал хийж зүрхийг нь байх ёстой газарт нь шилжүүлэхэд  шаардлагатай 200 мянган юань буюу 33 мянган доллар зургаа хоногийн хугацаанд цугларчээ.
Түүнийг энэ оны эхээр тосгоноосоо Ухань хотод ирж эмчид үзүүлэхэд эмч Дун Няньго нь түүний өнөө хүртэл амьд сэрүүн байгааг хараад нүдэндээ ч итгэхгүй байсан гэнэ. Олон цаг үргэлжилсэн мэс заслын дараа тэрээр бие нь илааршиж анх удаа хүн шиг чөлөөтэй явж, хөдөлж байгаа гэнэ.