Индиан урлагийн нэрт “Имайра” хамтлаг Монголд төдийгүй Азид анх удаа энэ сарын 5, 6-нд Соёлын төв өргөөнд тоглолтоо хийх гэж байна. Тэд өчигдөр Улаанбаатар хотод ирж, хэвлэлийн бага хурал хийж, индиан үндэсний хувцастайгаа Чингис хааны хөшөөнд хүндэтгэл үзүүллээ. Уг тоглолтыг урлагт хайртай дөрвөн залуу нэгдэн дэлхийн соёл иргэншлийн нэгэн том төлөөлөл болох эртний угсаа гарал нэг индианчуудын урлаг, соёлоос эх орон нэгтнүүддээ танилцуулахаар ийнхүү зохион байгуулж байгаа аж. Индиан өв, соёлоо өнөөдрийг хүртэл хадгалан түгээн дэлгэрүүлж яваа “Имайра” хамтлаг нь 1990 онд Өмнөд Америкийн уугуул иргэн болох Боливи улсын иргэн Милтон Элвис Колкүэ Гуаравиа, Перу улсын иргэн Дани Кама Хинохоса нарын бүрэлдэхүүнтэйгээр байгуулагджээ. Тэд ардынхаа үндэснийхээ дуу, хөгжмийг амьдаар тоглохоос гадна дэлхийн сонгодог хөгжим, аязуудыг орчин үеийн болон уламжлалт хөгжмийн зэмсгүүдээрээ тоглож дуулахын зэрэгцээ индиан бүжгийг бүждэг хамтлаг юм байна. “Имайра” хамтлаг нь долоо цомог гарган Хорват, АНУ, Польш, ХБНГУ зэрэг орноор аялан тоглолт хийж байжээ. Тэд тоглолтоороо үзэгчдэд хэзээ ч мартагдашгүй дулаан уур амьсгал, үл мартагдах хөгжмийн аялгуу, өвөрмөц бүжгийн хөдөлгөөн, хүн байгаль хоёр мөнхийн холбоотой шүү гэдгийг сануулах гол зорилготой байдаг аж.