Apple компани хэрэглэгчдийнхээ хүлээж ядаж байсан шинэ iPhone-оо олон нийтэд танилцууллаа. Гэхдээ бүр хоёр шинэ загварыг шүү. Нэг нь бидний мэдэж байсанчлан хямд үнэтэй, олон янзын өнгөний сонголттой iPhone 5С. Харин нөгөөх нь хэвлэлийнхний чихэнд хүрч амжаагүй байсан iPhone 5S хэмээх шинэлэг загвар. Apple-ийн гэнэтийн бэлэг болж чадсан 5S-ийн хамгийн гол онцлог бөгөөд шинэлэг тал нь хэрэглэгчийн хурууны хээг таних товчлууртай аж.  
iPhone 5C-гийн тухайд поликарбонат хуванцар буюу арай хямд материалаар хийсэн учир зах зээлийн үнэ нь 99 ам.доллараас эхэлж байгаа аж. Гэвч гар утасны үзүүлэлт нь өмнөх загвартай яг ижилхэн А6 процессор, 8 мегапиксель камертай, 4 инчийн дэлгэцтэй аж. Цэнэгээ барих чадварын тухайд iPhone5-аас үл ялиг  илүү,  мөн FaceTime HD хэмээх шинэ камертай юм байна.
Хэдийгээр гар утасныхаа үзүүлэлтийг дордуулаагүй ч ийм хямд өртөгтэй iPhone гаргасан нь Apple өөрийнхөө имижийг эвдэж буй хэрэг гэж зарим зах зээл судлаач үзэж байна.

Гэвч Apple хямд iPhone-оор хэрэглэгчдийг татаад зогсохгүй, үргэлж шинийг сэддэг, смартфоны зах зээлийг тэргүүлэгчдийн нэг гэдгээ 5С-тэй хамт гаргасан 5S загвараараа харууллаа.  5S нь дээд зэргийн хөнгөн цагаанаар хийсэн алтлаг, мөнгөлөг болон хар гэсэн гурван өнгөний сонголттойгоор худалдаанд гарч байгаа нь хэрэглэгчдэд дасал болсон хар, цагаан өнгөнөөс татгалзуулснаараа шинэлэг болж чадлаа. Мөн 5S-д А7 чип суулгаж өгсөн нь өмнөх загвараасаа хоёр дахин хурдан үйлдэл гүйцэтгэх боломжтой болгож өгчээ. Мэдээж 5S-ийн хэрэглэгчдийг татах хамгийн гол чанар бол хурууны хээ таних товчлуур. 28 мегапикселийн панорам зураг авах чадалтай LED камертай, тасралтгүй ярих горимд 10 цаг, хэвийн нөхцөлд 250 цаг цэнэгээ барих энэ утасны үнэ 199-399 ам.доллараар тогтжээ.