2000 онд анхныхаа ялагчдыг өлгийдөн авсан сонгодог урлагийн уран бүтээлчдийн дунд зохион байгуулдаг “Classic Brit” наадмаас нэгэн мэдэгдэл хийлээ. Энэ нь амьдралынхаа бүхий л хугацаанд дуурийн урлагт хүчин зүтгэсэн “Дэлхийн гурван тенорын нэг” домогт дуучин Лучиано Павароттид хүндэт шагнал гардуулах тухай юм. Наадмын зөвлөлөөс 2007 оны эхээр түүний нэрийг дэвшүүлсэн ч нойр булчирхайн хорт хавдрын улмаас хорвоог орхисон юм. Иймээс   түүний эхнэр Николетта Мантовани Паваротид шагналыг зургаан жилийн дараа нөхөн олгохоор болсон байна.

Энэ мэдээг сонссон хатагтай Николетта “Нөхрийн минь дуурийн урлагт зүтгэсний 50 жилийн ой энэ жил тохиож байгаа. Энэ сайхан үйл явдалтай давхцан тус шагналыг олгохоор болсонд талархаад баршгүй нь” гэжээ. Сонирхуулахад, Николетта дуучны туслахаар олон жил ажиллаж байгаад ижил дасал болон 2003 онд гэр бүл болсон. Хэдийгээр өөрөөсөө үе мултарсан эмэгтэйтэй гэрлэлээ гэсэн хов жив их байсан ч түүнтэй хамт өнгөрүүлсэн хэдхэн жилд Павароттигийн амжилт үлэмж хэмжээгээр ахисан  талаар ойр дотны хүмүүс ярилцдаг гэнэ.