“Эрдэнэс Таван толгой” компанийн Баруун Цанхийн уурхайн нүүрсний экспорт энэ сарын 5-нд эхэлсэн. Одоогоор тус уурхайгаас 63.7 мянган тонн нүүрс экспортлоод буй аж. Баруун Цанхийн уурхайн нүүрсний гэрээт олборлогчоор “Хишиг Арвин Индустриал”, “Мера”, “Монголын Үндэсний олборлогч” компанийн “Монгол уурхайчид” түншлэл шалгаран ажиллаж байгаа юм. Үүнээс гадна нүүрс экспортлох гэрээг БНХАУ-ын “Вэнсвэй”, “Пушин” зэрэг таван компанитай хийсэн байна.
“Эрдэнэс Таван Толгой“ ХК энэ онд тус  уурхайгаас гурван сая тонн нүүрс олборлох төлөвлөгөө бий. Тэгэхээр нүүрсний орлого 120-150 сая ам.доллараар нэмэгдэх тооцоо бий.
Харин Зүүн Цанхийн уурхайгаас 4.5 сая тонныг олборлон борлуулна.