Авьяас, ур ухаан, хүсэл мөрөөдлөөр дүүрэн олон залуусын мөрөөдлийн гүүр болсон  “To be or not to be” буюу Орших уу, Эс орших уу?  театрчилсан шоуны техникийн зөвлөгөөний хурал СУИС-ийн “Оюутан театр”-т болсон. Өдгөө гурав дахь жилдээ зохиогдож буй шоу нэвтрүүлгийн шалгаруулалтын өмнө болдог энэ хурлаас оролцогчид чухал мэдээллүүдийг хүлээн авдагаараа онцлог бөгөөд төслийг санаачлан зохион байгуулагч UBS телевизийн уран бүтээлчид болон шүүгчдийн төлөөлөл Төрийн соёрхолт, МУАЖ Н.Сувд, Улсын Драмын Эрдмийн театрын Ерөнхий найруулагч, МУСТА  Н.Наранбаатар нар болон СУИС-ийн Тайз дэлгэцийн сургуулийн уран сайхны удирдаач, найруулагч Ц.Батнайрамдал нар нийт оролцогчиддоо тэмцээний талаар дэлгэрэнгүй мэдээлэл өгч, тэдний сонирхсон асуултанд хариулт өгсөн юм.

    Шоу нэвтрүүлгийн нэгдүгээр шатны шалгаруулалт 2013 оны 10 дугаар сарын 1,2,3-ны өдрүүдэд “Цүки хаус” төв -д зохион байгуулагдахаар товлогдоод байна. Мөн энэ жилийн шоунд  оролцох хүсэлтэй ч хараахан бүртгүүлж амжаагүй авьяастнууддаа боломж олгож зохион байгуулагчдийн зүгээс бүртгэлийн хугацааг 10-р сарын 1-нийг хүртэл сунгасныг мэдэгдлээ. Бүртгэлийг UBS телевизийн байранд  авч байна.