“Prosound” студийн дууны найруулагч Рагу Раман Монголын рок, попын төлөөлөл болсон шилдэг уран бүтээлчидтэй хамтран “The Mongolian Live Sessions” төслийг амжилттай хэрэгжүүлсэн билээ. Тэгвэл уг төслийн үргэлжлэл болгож урлагийн ертөнцөд шинэ хувьсал бий болгох, өөртөө итгэлтэй, хүсэл мөрөөдөлдөө үнэнч 12-25 насны дуулах, хөгжим тоглох авьяастай залуучуудыг дэмжих зорилгоор “Шинэ үе” реалити шоуг явуулахаар болжээ. Хоёр үе шаттай эл шоунд оролцогчдыг “Prosound” студийн дууны инженер Рагу Раман, хөгжмийн зохиолч Б.Чинбат, “The Mongolian Live Sessions” төсөлд орсон уран бүтээлчдийн төлөөлөл болон үзэгчдийн саналаар  14-ийг нь шилдгийн шилдгээр тодруулах гэнэ. Харин шилдэг 14 оролцогчийг Нью-Йоркийн “Guitar Center”-ийн хамгийн шилдэг брэндийн хөгжмөөр шагнах юм байна. Тэгэхээр Монголын рок, попын авьяастнуудын дуу хоолойны чадал цар хүрээг дэлхийн хэмжээнд таниулах зорилготой эл төслийн дараагийн шатнаас амьд хөгжмийн гэгдэх гялалзсан одууд төрөх нь.