Үр хүүхэд төрүүлж, ээж болно гэдэг эмэгтэй хүний амьдралын хамгийн нандин сайхан мэдрэмж. Гэвч их өвдөлт бас айдас тэр сайхан мэдрэмжийг баяр хөөртэйгөөр мэдрэхэд саад болж байдаг. Тийм ч учраас сүүлийн үед барууны орнуудад бие давхар эмэгтэйчүүдийг гэрт нь, хүүхдийн эцгийн хажууд тав тухтай амаржуулах туршлага нэлээд дэлгэрч байна. Мэдээж эмэгтэйг амаржих үед эх барих чиглэлээр мэргэшсэн туслах хамт байх бөгөөд төрөхийн өмнө болон дараа нь ч тухайн гэр бүлд заавар зөвлөгөө өгдөг аж. Эхийг өвдөх үед хөгжим сонсгож, биед нь иллэг массаж хийж өгч, зөв амьсгалахад нь туслан, хайртай дотны хүмүүс нь хамт байхаар стресс зовиур нь бага, амар тайван төрдөг байна.

Зураг дээрх Жулия Маринкэт хэмээх бүсгүй яг энэ аргаар амаржсан бөгөөд түүнийг төрөх үед эх барих чиглэлээр мэргэшсэн гэрэл зурагчин хамт байж, амьдралынх нь хамгийн баярт мөчийг гэрэл зурагт буулгажээ. Жулия өөрөө гэрэл зурагчин учир амаржих үеийнхээ зургийг авч үлдэхийг хүссэн байна.  Түүнийг амаржих үед нөхөр Крис болон ээж нь, эмээ өвөө нь, мөн эгч дүүс нь хамт байж, сэтгэл санаагаар дэмжиж байжээ. Тийм ч учраас Жулия төсөөлж байснаас харьцангуй бага өвдөж, сэтгэл амар төрсөн хэмээн ярьжээ. Түүнтэй адил гэртээ усан ваннд амаржиж буй бүсгүйн дүрс бичлэг хэдэн сарын өмнө Youtube-ээр цацагдахад олон нийтийн сүлжээгээр хит болж байсан билээ.