Британийн Уилтишир гүнлэгт хуримлаж байгаа залуу хос хуримаа өвөрмөц болгох гэж өөрсдийн сургуультай шар шувуугаар хуримын бөгжөө авчруулахаар зохион байгуулжээ. Номлогчийг үгээ хэлж дуусангуут л Дарси шар шувуу хуримын бөгжийг нь аван нисч ирэх ёстой байсан ч өнөөх нь чинь сүмийн дээврийн хөндөл модон дээр суугаад унтчихаж. Дуудаад дуудаад бууж ирдэггүй цаг хэртэй болсон тул Дарсигүйгээр хуримаа үргэлжлүүлье гэж гэгээнтэн хэлжээ. Хосуудад азаар залуугийн байнга авч явдаг өөр нэг хос бөгж байсан  болохоор түүнийгээ солилцон ёслол дуусчээ. Унтамхай Дарсиг шатны тусламжтайгаар буулгаж авсан байна.