Австрали эр Шейн Уилмотыг үнэхээр тэвчээртэй хүн гэж хэлэхээр өөр арга үгүй. Та боддоо. Энгийн саарал хулганыг та хэдэн секунт нэг жижигхэн хавтгай модон дээр тогтоож чадах вэ. Амаргүй санагдаж байгаа биз. Гэтэл 42 настай амьтан сургагч маань хулганыг скейтборд, серфингээр гулгадаг болгож чаджээ. Уилмотын ярьснаар хулганыг энэ спортоор хичээллэж сургах тун төвөггүй байж. Учир нь хулгана бол байгалиасаа эдгээр спортын мастер байх  чадвартай заяагджээ. “Тэдэнд энэ нь таалагддаг юм билээ. Хулгана хавтан дээр гулгахахад хамгийн тохиромжтой амьтан. Тэд хүндийн төвөө гарамгай олдог. Хавтангаасаа унасан  ч эргэж үсрээд л түүн дээрээ гарчихдаг” хэмээн тэрээр ярив. Уилмот ойролцоогоор 10 жилийн өмнө энэхүү хоббигоо хөгжүүлж эхэлжээ.  Эхлээд тэрээр хулганыг зөвхөн серфингээр гулгаж сургаж байсан бол удалгүй хүйтний улирал, цасан дээр дасгал сургуулилт хийлгэж үзсэн гэнэ.  Өөрийн байшингийн ар талд тэрээр бяцхан тамирчиддаа зориулан скейтпарк байгуулжээ.  Урт сүүлт тамирчид өдөр бүр энэ талбайдаа бэлтгэлээ хангадаг. Саяхан дасгалжуулагч бяцхан тамирчдаа маш эрсдэлтэй үзүүлбэрт сургасан гэнэ. Гал асаасан цагираг дундуур скейт унасан хулганууд нь харайж сурчээ. Дасгалжуулагч “ Би өөрийнхөө амьтдад хайртай учраас тэдэндээ хэзээ ч муу муухай зүйл хийхгүй. Би тийм хэрцгий хүн биш. Энэ 10 жилийн хугацаанд нэг ч хулгана маань сургуулилт дасгал, үзүүлбэрийн үеэр үхээгүй юм шүү” хэмээн бардам ярьж суугаа юм.