Умард Солонгосын удирдагч Ким Чен Уны гэр бүлд төрөл садны болон улс төрийн харилцаа тасарч эхэллээ. Удирдагчийн авга эгч Ким Ген Хи өөрийн төрсөн ах Ким Чен Ирийн нас барсны хоёр жилийн ойд зориулсан арга хэмжээнд хүрэлцэн ирээгүй байна. Ердөө өнгөрсөн долоо хоногт түүний нөхөр Чан Сон Тхэкийг төрийн эргэлт хийхээр бүлэглэл зохион байгуулсан хэргээр зээ дүү Ким Чен Ун нь цаазалсанд гомдсон бололтой. Чан Сон Тхэкийг хар тамхи, мөрийтэй тоглоомын болон садар самуун сурталчилсан, хууль бус бизнес хийсэн хэмээн буруутгасан юм.
Их удирдагчийн талийгаач болсны ойд зориулсан арга хэмжээг умардын төв телевизээр шууд дамжуулахад авга эгч нь ч, Ким Чен Уны гэргий Ли Соль Жу ч харагдаагүй байна. Харин залуу удирдагчийн дэргэд цэрэг, улстөрийн томцуул л байжээ.