Гүржийн ерөнхийлөгч асан Михаил Саакашвили өнөөгийн Украинд болж байгаа үйл явдлыг ОХУ-ын ерөнхийлөгч Владимир Путинд барьцаалагдсан нисэх онгоцтой зүйрлэсэн байна. “Украинд болж байгаа үйл явдал бол надад нисэх буудалд буух гээд зорчигчиддоо зарлачихаад байтал буухаас хэдхэн минутын өмнө алан хядагч онгоцыг нь барьцаалан онгоцны ахмадыг чиглэлээ өөрчлөн нисэхийг шаардсантай адил санагдаж байна” хэмээн Саакашвил Facebook-тээ бичжээ. Тэр бас онгоц барьцаалагч Путин “зорчигчдыг бүхий л үнэт зүйлээ өгөхийг” тулган шаардаж байна гэсэн байна. Түүнийхээр бол Киевт болж байгаа жагсаал цуглаан Путинд бүхнээ өгөлгүй, “өөр том, сайхан онгоцоор чиглэлээ өөрчлөн нисэхийг оролдож байгаа” хэрэг гэнэ.
Үүний өмнө Гүржийн экс-ерөнхийлөгч Саакашвили украины сөрөг хүчний нэг удирдагч Виталий Кличкотой уулзсан юм. Тэр бүү хэл Саакашвили, европарламентын хэд хэдэн депутаттай хамт Киевт болж байгаа жагсаал цуглаанд очиж үг хэлсэн байна.
Харин Гүржийн эрх баригчид энэ тухайд Саакашвилийн үйлдэл бол Тбилисийн албан ёсны байр суурь биш хэмээн  мэдэгдэж байгаа юм.