АНУ-ын Ерөнхийлөгч Б.Обама Сочигийн олимпын нээлт, хаалтад оролцох өөрийн төлөөлөгчдийн дунд ижил хүйстэн Билли Жин Кингийг багтааснаар ОХУ-ын ижил хүйстнүүдийн эсрэг хуулийг хэрхэн үзэж буйгаа тодорхой харууллаа. Ерөнхийлөгч Б.Обамаг төлөөлөн олимпын ёслолд оролцох Билли Жин Кинг бол ижил хүйстэн гэдгээ олон нийтэд зарласан, теннисийн алдартай тамирчин билээ. Энэ удаагийн олимпын ёслолд Ерөнхийлөгч, тэргүүн хатагтай, дэд Ерөнхийлөгчийн аль нь ч оролцохооргүй болсон нь ч санамсаргүй хэрэг биш бололтой. Б.Обама өмнө нь “Ижил хүйстэн, трансжендер хүмүүст хор хөнөөлтэй улс орнуудыг тэвчихгүй” хэмээн мэдэгдэж байсан юм. Харин ОХУ-ын хууль тогтоогчид өнгөрсөн зургадугаар сард “уламжлалт бус сексийн харилцааг сурталчилсан” аливаа зүйлийг хориглох тухай хууль баталсан. Энэ нь олимп зохион байгуулах гэж буй орны хувьд нэр хүндийг нь ихээр унагаж, барууны зарим орны удирдагч Сочигийн олимпын нээлт, хаалтад оролцохгүй гэж мэдэгдсэн юм.