Террорист халдлагад өртөн сүйдсэн Дэлхийн худалдааны төвийн хос барилгын суурин дээр барьж буй есдүгээр сарын 11-ний дурсгалын музей ирэх жилийн хавар ашиглалтад орно.
Уг музейд 10 мянга давсан тооны үзмэр тавигдах юм. Хамгийн сонирхолтой үзмэр нь хуучин барилгын анх онгоц мөргөсөн зүүн хойд талын эвдэрч сүйдсэн төмөр багана аж. Олон хүний амьдралыг орвонгоор нь хөмөрсөн хар үйл явдлын гэрч болон байгуулагдаж буй уг музейн ерөнхий менежер Майкл Плейжер хэлэхдээ, “Энд амь үрэгдсэн хохирогчдыг мартаж болохгүй, өнөөдөр нисэх буудалд мөрдөх болсон хатуу чанга шалгалт, АНУ-ын Үндэсний аюулгүй байдлын албанаас иргэдийн утсан холбоог чагнасан асуудлын гол шалтгаан нь есдүгээр сарын 11-ний хэрэг явдал юм. Манай музей бидний ирээдүй хойч үед энэ тухай боловсрол олгох үүрэг хүлээж байна” гэв.