Дэлхийн дулаарлын нөлөөгөөр олон оронд урьд нь огт үзэгдэж байгаагүй байгалийн үзэгдэл болсон тухай мэдээ тасрахгүй байна. Халуун дулаан уур амьсгалтай Вьетнамд өвлийн улиралд агаарын хэм +10-аас буудаггүй. Гэтэл сүүлийн хоёр өдрийн дотор хойд нутгуудад нь агаарын хэм -5 градус хүртэл бууж цочир хүйтэрсэн байна. Дээр нь сүүлийн 100 жил үзэгдээгүй их хэмжээний цас оржээ. Үүнээс болж 100 гектар орчим эзэлсэн их хэмжээний тариалан хөлдсөний улмаас нийт таван сая орчим ам.долларын хохирол учирсан гэнэ. Цас, хасах градусын хүйтэн, өвлийн дугуй гэгчийн кино, интернэтээр л үзэж байсан хүмүүс ихэд цочирдсон нь ойлгомжтой. Цас гэж юу байдгийг өөрийн нүдээр харах гэж олон мянган хүн машин унан тус нутгийг зорьсны улмаас зам бүхэлдээ түгжрэлд оржээ.
Орон нутгийн эрх баригчид бүх сургууль, цэцэрлэгийг түр хаасан байна.