Samsung компани Galaxy S цувралынхаа шинэ бүтээл болох S5 утсаа ирэх дөрөвдүгээр сард худалдаанд гаргана гэж мэдэгджээ. Гэхдээ энэ утас өмнө загваруудаасаа юугаараа давуу талтай байхыг компанийн зүгээс нууцалж байна. Харин зах зээлд аль хэдийнэ хүлээлт үүсгэсэн энэ утасны тухай нүдний солонгон бүрхэвчээр танидаг технологитой, эсвэл толгойн хөдөлгөөнөөр удирддаг онцлогтой  гэсэн янз бүрийн таамаг төсөөллүүд гараад байгаа. Энэ тухай тус компанийн удирдлага Bloomberg-т өгсөн ярилцлагадаа хэлэхдээ "Бид нүдний солонгон бүрхэвчээр таних технологийг ихэд сонирхон судалж байгаа. Гэвч энэ удаа S5 ийм технологитой гарах эсэхийг хэлж мэдэхгүй байна" гэжээ. Харин толгойн хөдөлгөөнөөр удирддаг програмын тухайд Samsung энэ технологио аль хэдийнэ патентжуулж авсан байна. Ямартай ч гурван сарын дараа хэрэглэгчид хүрэх S5 ямар нэгэн онцгой чадвартай байна хэмээн олон нийт итгэн хүлээж байна. Одоо зах зээлд худалдаалагдаж буй хамгийн сүүлийн үеийн смартфон болон iPhone 5S хурууны хээгээр, харин S4 хэрэглэгчийн нүүрээр таньдаг учир S5 нүдний солонгон бүрхэвчийг таньдаг онцгой чадвартай гарахыг үгүйсгэхгүй юм.