Уран гулгалтын олимпын аварга Ким Юна энэ удаагийн олимпод J.Estina брэндийн хатан хааны титмийг дүрсэлсэн ээмэг зүүх гэж байсан ч Олон улсын олимпын хорооноос хоригложээ. Тэрээр энэ ээмгээ 2010 оны Ванкуверийн олимпын үеэр зүүж байсан ч энэ удаа хориглосны учир нь олимпод оролцож буй тамирчид ОУОХ-ны ивээн тэтгэгчдээс өөр бизнесийн байгууллагын бараа бүтээгдэхүүнийг сурталчилж болохгүй гэсэн дүрмээс болжээ. Өнгөрсөн олимпоор Ким Юна дээрх брэндийн гурван өөр загварын ээмгийг зүүсний дараа,  J.Estina брэндийн борлуулалт гурав дахин нэмэгдсэн гэдэг. Гэхдээ тус компанийн зүгээс олимпын аварга бүтээгдэхүүнийг нь сурталчлах гэж зүүгээгүй хэмээн тайлбар хийж байсан юм. Харин  ОУОХ энэ удаа алдаа гаргахыг хүсээгүй бололтой, анхнаас нь Ким Юнагийн ээмэгт анхаарал тавьжээ. Ер нь, олимпын хороо 2012 оны Лондонгийн олимпоос эхлэн албан ёсны спонсоруудаас бусад компанийн бараа бүтээгдэхүүнийг сурталчлахгүй гэсэн дүрмээ хатуу чанд мөрдөх болсон юм.
Олимпын албан ёсны ивээн тэтгэгч болохын тулд компаниуд дунджаар 100 сая ам.доллараас дээш хэмжээний мөнгө төлөх ёстой байдаг аж.