Эх орноосоо гараад 30 гаруй жил болсон үлэг гүрвэлийн “сүргийн” ихэнх хэсгийг Монголдоо буцаан авчраад байна. Уг үлэг гүрвэлийн үзмэрүүдийг 1980-аад оны дунд үеэр Японы 19 хотод гарган үзүүлж байсан бол ардчилалд шилжсэний дараа Европын орнуудад дэлгэн үзүүлж эхэлсэн юм.
Европын орнуудаас хамгийн түрүүнд Унгарын нийслэл Будапештэд гаргаснаас хойш Итали, Франц, Австри, Герман, Египет, Англи, Дани, Финланд, Португали, Испани, Сан Марино, Чили зэрэг 13 улсын нийт 30 хотод уг үзэсгэлэнг гаргажээ. Энэ үзэсгэлэнд тарбозаврын бүтэн хэлхээ яснаас эхлээд үлэг гүрвэлийн зулзаганы хэлхээ яс, үлэг гүрвэлийн өндөгтэй үүр болон үлэг гүрвэлтэй нэгэн цаг үеийн амьтан, ургамлын төлөөлөгч болох усны сээр нуруугүй амьтдын 130 гаруй үзмэр багтаж байсан аж. Тэдгээрийн зарим хэсгийг өнгөрсөн  оны аравдугаар сарын 25-нд  Японы Токио хотод нээгдсэн “Говь-үлэг гүрвэлийн хамгийн гайхамшигтай өлгий нутаг” сэдэвт үзэсгэлэнд тавьж, үлдсэн хэсгийг нь далайн тээврээр дамжуулан Монголд авчирч, ШУА-ийн Палеонтологийн төвд хүлээн аваад байна.