Хэдхэн жилийн өмнө хонхны баяртай холбоотой дуу дуулдаг уран бүтээлч цөөн байлаа. Хаврын урь орохтой зэрэгцээд л тэдний сезон эхэлдэг тул амандаа орсон тоогоо хэлчихээд гэдийгээд суучихдаг байв. Бараг л Монгол Улсын гавьяат жүжигчин Ч.Бат-Эрдэнэ ганцаараа ноёлдог байсан гэхэд дэгсдүүлсэн болохгүй.

Овоо гэгч нь мөнгө халааслачихдаг байсан болохоор нийтийн, рок попынхон тэр бүү хэл хип хопчид хүртэл өөрсдийн гэсэн хонхны баярын дуутай болсон. Тиймээс гарын арван хуруунд багтахаар цөөн биш “Дижитал” хамтлагийн “Мөнгөн хонхны баяр”, Мөнхбат, Үүрээ нарын хамтарсан “Зүрхэнд эгшиглэх хонхны дуу”, “Номин талст” хамтлагийн “Сүүлчийн хонхны дуу”, Хип хопчдын хамтран дуулсан “Хонхны дуу”, “Мөнхийн реп” хамтлагийн “Мөнгөн хонхны дуу”, Монгол Улсын гавьяат жүжигчин Т.Ариунаа, С.Сэрчмаа, BX нарын хамтран дуулсан дуу, “Хурд”-ынхны гээд олон дуунаас сонголтоо хийх боломжтой болсон байгаа.

Тиймээс ЕБС гэлтгүй их, дээд сургуулиудын удирдлагууд сургуулийнхаа нэр төр, цар хүрээг бодож мөнгөн хонхныхоо баярын арга хэмжээнд гар таталгүй дуучдыг урьж, хэлсэн мөнгийг нь тоо ёсоор нь өгдөг болсон билээ. Ямартай ч энэ жилийн хувьд дуучид маань нэг дуугаа 300, хоёрыг дуулуулбал 600 гээд өөр өөрсдийн ханшаа тогтоож, эхнээсээ урилга заллагад дарагдаад байгаа гэнэ шүү.