Оскарын шилдэг эмэгтэй туслах дүрийн шагналыг "12 жилд боолчлолд" киноны Лупита Нионго хүртсэн нь үзэгчдийн ч, мэргэжилтнүүдийн, мөн Холливудын ертөнцийнхний сэтгэлд нийцсэн шагнал боллоо. 31 настай жүжигчин бүсгүйн дэлхийн анхны гол дүр болсон энэ кино түүнээс асар их ур чадвар шаардсаныхаа хэрээр асар өндөр амжилт авчирч чадлаа. Оскарын ёслолд Прадагийн усан цэнхэр даашинзтай ирэхдээ "Сахиусан тэнгэр болсон юм шиг санагдаж байна" гэж ярьж зогссон тэрээр үнэхээр Оскарын алтан бурхныг өөрийн болгож чадлаа.
Лупита энэ шагналыг авах эрхтэй, түүнийг л байгаасай гэж хүсч байна хэмээн түүнтэй хамт өрсөлдсөн Женнифер Лоренс хүртэл Оскарын өмнө ярьж байжээ. Анхны дүрээрээ анхны Оскараа хүртсэн түүнд баяр хүргэхээр одод бүгд хошуурч байсан нь тайзны ард ажиллаж байсан гэрэл зурагчдын дуранд үлджээ.
Лупита Оскарын өмнө хар арьст эмэгтэй жүжигчдийн арга хэмжээнд оролцохдоо гоо үзэсгэлэнгийн талаар сэтгэл хөдөлгөсөн үг хэлсэн нь олны таашаалд нийцэж, зөвхөн энэ үгийнх нь төлөө Оскар өгсөн ч багадана хэмээн хэвлэлүүд бичиж
байна.