Өглөө сэрүүлгийн дуунаар сэрэх хүн бүрт тийм ч таатай санагддаггүй нь лавтай. Харин түүний оронд гал дээр сайхан шарж байгаа гахайн махны үнэр, шаржигнах чимээнд сэрвэл илүү урам зоригтой босно доо. Оскар Мэйер хэмээх гахайн мах үйлдвэрлэдэг компани яг ийм сэрүүлэгний аппликейшныг iPhone-д зориулан гаргасан байна. Энэ апп-ыг  утсандаа татсанаар өглөөний ердийн сэрүүлгийн дууны оронд яг л гахайн мах шарж байгаа чимээ гарах аж. Харин үнэрийг нь үнэртэхийн тулд нэмэлт жижиг төхөөрөмж гар утсандаа холбох ёстой гэнэ. Тун ч таатай сонсогдох энэ апп гэм нь зөвхөн Америкийн хэрэглэгчдэд зориулагдсан аж. Америкчууд ийм сэрүүлэгтэй болохын тулд Оскар Мэйер компаниас зарласан уралдаанд оролцох ёстой бөгөөд түрүүлсэн хүмүүст шарсан махны үнэр гаргадаг төхөөрөмжөө цөөн тоогоор бэлэглэх юм байна.