Оскар, Алтан бөмбөрцөг, БАФТА гээд дэлхийн хамаг л том шагналуудыг түүсэн “Frozen” хүүхэлдэйн кино бас нэг том амжилтын эзэн боллоо. Өнгөрсөн амралтын өдрүүдээс Японы кино театруудаар гарч эхэлсэн тус хүүхэлдэйн киног япончууд хуйлран үзэж, тасалбар нь өндөр борлуулалттай байгаа нь “Frozen”-ы нээлтээ хийснээс хойш олсон нийт орлогыг 1,072 тэрбум ам.долларт хүргэсэн байна. Үүгээрээ “Toy Story 3”-ын амжилтыг эвдэж, хамгийн өндөр орлого олсон хүүхэлдэйн кино боллоо. Дисней/Пиксарын бүтээл “Toy Story 3” хүүхэлдэйн кино 1,063 тэрбум ам.долларын орлогоор “Frozen”-ээс өмнө дэлхийн рекордыг эзэмшиж байсан юм.

Барууны орнуудаас эхлээд одоо Азийн орнуудыг ч бас байлдан дагуулж буй “Frozen” зөвхөн АНУ-ын зах зээлээс 398 сая ам.долларын орлого олсон бол, дэлхийн бусад оронд 674 сая ам.долларын тасалбар борлуулжээ.
Уолт Дисней студид бүтээж, 2013 оны арваннэгдүгээр сард дэлгэцэнд гарч эхэлсэн энэ хүүхэлдэйн киног Ханс Кристиан Андерсоны “Цасан хатан” үлгэрээс сэдэвлэн хийсэн юм.