ОХУ-ын алс дорнодын хязгаарын Уссурын хүүхдийн нэг эмнэлгийн эмч хоёр сартай хүүхдийг үзэх үедээ нярай хүүхдийн хоёр хөлийг гэмтээсэн явдал гарчээ. Энэ талаар бяцхан хүүхдийн ээж Оксана Новоселова эмэгтэй,  эмч хүүг нь үзэхдээ хоёр хөлийг нь дэндүү чангаар хоёр тийш нь татаж гэмтээсэн гэжээ. “Би эмчийн өрөөнд ороод картаа өгөөд хүүхдээ үзлэгийн оронд дээр нь хэвтүүлсэн. Намайг хол бай гэхээр нь би холдоод зогссон. Тэгээд харж байсан чинь хүүхдийн минь хөлийг алцайлгаад, тэгтэл “нурх” хийж дуугарах чимээ гарсан” гэж хүүхдийн ээж ярьжээ.
Үнэхээр эмнэлгийн шинжилгээний рентген зургаар нярай хүүхдийн дунд чөмөг, сүүж  бэртсэн нь нотлогдсон болохоор  хууль хяналтын байгууллагууд энэ хэргийг шалгаж эхэлсэн байна.
“Одоо энэ хэргийг шалгаж эхэлж байна. Хүүхэд эрүүл байсан эсэх, эмч хэрхэн яаж хандсан гээд тодруулах асуудал байна” гэж Приморийн хязгаарын прокурорын туслах Елена Телегина хэлжээ. Рентгенээр авсан зургаар бол нярай хүүхэд аарцагны ясандаа хүнд гэмтэл авсан нь харагдсан байна. Одоо хүүхэд гэмтэл согогийн эмнэлэгт асруулж байгаа ч хүүхдийн эцэг эх нь Приморийн эрүүл мэндийн газарт гомдол гаргаад байгаа юм байна.