Монгол баатруудын 1400 жилийн өмнө тоглож байсан Алтай ятгыг Монголчууддаа болон дэлхий дахинд сонордуулах их ёслол энэ сарын 16-нд АСА циркэд болсон юм.

Ёслолын үеэр Монгол Улс, ХБНГУ-ын хооронд дипломат харилцаа тогтоосны 40 жилийн ойг тохиолдуулан   Алтай ятгыг Монгол, Германы соёлын харилцааны бэлгэ тэмдэг болгон Монгол Улсын Гадаад харилцааны сайд Л.Болд, ХБНГУ-аас Монгол Улсад суугаа Элчин сайд Г.Тийдеманн нар албан ёсоор зарлаж буйгаа илэрхийлж батламж олгов.

Алтай ятгыг дуурьсгах Монгол баатраар мэргэжлийн сумогийн 68 дахь их аварга Асашёорюү Д.Дагвадорж тодорсон бөгөөд ёслолд нэрт ятгачин Ч.Мөнх-Эрдэнэ, Бөртэ, Алтай хамтлаг, АСА циркийн жүжигчид зэрэг нийт 100 орчим уран бүтээлч  оролцов.

1400 жилийн настай эртний нүүдэлчдийн соёлын хосгүй үнэт өв болох энэхүү дурсгалыг  Ховд аймгийн Манхан сумын Жаргалант хайрхан уулын агуйн булшнаас 2008 онд археологийн малтлагаар илрүүлж, ХБНГУ-д сэргээн засварласан юм.