Өөд болоод таван жил өнгөрсөн ч домогт дуучин Майкл Жексоны өнгөрсөн долоо хоногт худалдаанд гарсан “Xscape” цомог Их Британийн хөгжмийн жагсаалтыг тэргүүлж эхэлжээ. Энэ цомогт попын хааны урьд хожид олны хүртээл болж байгаагүй найман дуу багтсан бөгөөд дуучин эдгээрийг 1983-1999 оны хооронд бичүүлсэн байж. Эдгээр уран бүтээлийг нь Тимбэрланд, Родни Жеркинс зэрэг продюсерууд хамтран ажиллаж цомог болгосон аж.  
Мөн дуунуудын эх бичлэгийг “Deluxe edition” гэх тусгай цомог болгон гаргах гэнэ. Жексоныг нас барснаас хойш түүний олонд хүрээгүй дуунуудаас бүтсэн “Michael” /2010/ болон “Immortal” /2011/ цомог фэнүүдэд нь хүрч байсан бол “Xscape” гурав дахь нь болж байна.