Дэлхийн хамгийн сайхан залууг тодруулдаг "Mister World" тэмцээн Английн Девонд болж, 45 орны мистерүүд оролцсоноос Данийн 23 настай залуу дэлхийн мистерээр тодорчээ. Улсдаа болсон "Mister Denmark" тэмцээнд 100 гаруй залууг ардаа орхиж түрүүлсэн Никлас Педерсон мужаан мэргэжилтэй нэгэн гэнэ. Олон төрлийн спортод дуртай, идэвхтэй амьдралыг эрхэмлэдэг тэрээр биеэ төгс сайхан хөгжүүлснээрээ үзэгчдийг төдийгүй шүүгчдийн бахархлыг төрүүлж байжээ. Түүнээс гадна үргэлж баяр хөөртэй, аливаа зүйлд өөдрөгөөр ханддаг нь үеийн залуусаас ялгарч байсан учраас шүүгчид түүнийг мистерээр сонгожээ.
Дэлхийн мистер болж 50 мянган ам.долларын шагнал авсан Никлас энэ мөнгөө өөртөө зарцуулахгүй дэлхийгээр аялж, бусдын сайн сайхны төлөө зориулна хэмээн мэдэгджээ. Түүнээс хамгийн түрүүнд Гайтид очиж, гамшигт өртсөн айл өрхүүдэд байшин барьж өгөхөд өөрийн гараар туслах бодолтой байгаа гэнэ.