Нярай хүүхдийг зургаан сар хүртэл нь ус өгөхгүй байхыг эмч мэргэжилтнүүд зөвлөж байна. Эхийн сүү амны цангааг тайлдаггүй гэх ойлголт зарим ээжид байдаг нь буруу гэнэ. Учир нь, хөхний сүүний 80-90 хувь нь ус байдаг. Тиймээс эхийнхээ сүүгээр хооллож байгаа хүүхдэд шингэн дутагдах, амны цангаа тайлагдахгүй байх ямар ч үндэсгүй, өөрт хэрэгцээтэй бүх шингэн болоод шим тэжээлээ сүүнээсээ авдаг аж. Зарим ээжүүд халуун өдөр нярай хүүхдийнхээ ам цангана гээд ус их өгдөг талтай. Түүнийхээ оронд хөхүүлэх зайгаа ойртуулж, аль болох уснаас татгалзахыг мэргэжилтнүүд зөвлөж байна. Учир нь, зургаан сар хүрээгүй нярайн хувьд хэтэрхий их ус ууснаар эхийн сүү, нэмэлт тэжээлийнхээ шим тэжээлийг хэрхэн шингээж авахаа зохицуулж чадахаа больдог. Нөгөө талаар ус гэдсийг нь дүүргээд сүүгээ бага уухад хүргэнэ. Харин хүүхдэд эрүүл өсч бойжиход нь байнгын шим тэжээл хэрэгтэй байдаг учраас сүүнээс авах тэжээлийг нь багасгах, улмаар өсөлтийг нь сааруулах аюултай. Маш ховор тохиолдолд ус их уусан нярай түүнээсээ хордож, бүр комд орох явдал ч байдаг гэнэ .
Ингэж нярай хүүхдийн усны хэрэглээг зохицуулахаас гадна угждаг хүүхдүүдэд сүүн тэжээлийг нь найруулж өгөхдөө усны хэмжээг хэтрүүлэхгүй, яг зааврын дагуу хийх ёстой. Зургаан сар хүрсэн хүүхдэд ам цангасан үед хэдхээн балга ус угжаар өгөхөд гэмгүй. Харин нэг ой хүрээд, бор хоол байнга иддэг болсон үед нь хүссэн хэмжээгээр нь ус өгч болно.