Одоогоос хоёр жилийн өмнө Монгол Улсын Ерөнхийлөгчийн ивээл дор “Монгол ардын дуугаа өвлөн дуулцгаая” тоглолтоо хийж байсан “Монгол Эгшиглэн” хамтлагийнхан удахгүй гурав дахь бие даасан тоглолтоо хийх гэж байна. Тус хамтлагийнхан энэ удаагийнхаа тоглолтын орлогоо Эх хүүхдийн эрүүл мэндийн үндэсний төвийн мэс заслын дараахь эрчимт эмчилгээний тасгийн сахиурын таван өрөөг шинээр бий болгон тохижуулахаар болжээ. Энэхүү тоглолтын ерөнхий санаачлагчаар нь “Эгшигийн учиг” ТББ-ынхан ажилласан байна. мөн “Бид монгол хүүхдүүд-2012” тоглолтод урилгаар язгуур урлагийн “Домог”, Дархан хотын “Эгшиглэнт чимээ” хамтлагуудаас гадна УДБЭТ-ын дуучид оролцох аж. Дашрамд сонирхуулахад, тус хамтлагийн хүүхдүүд 4-5 настайгаасаа эхлэн монгол ардын дуунуудаас дуулж анхны цомгоо гаргаж байжээ.