Уул уурхайн яамны Бодлогын хэрэгжилтийг зохицуулах газрын дарга Б.Батхүүгээс хайгуулын лиценз хэрхэн олгох талаар тодрууллаа.

-Шүүхийн шийдвэрээр лиценз нь хүчингүй болсон хайгуул болон ашиглалтын 106 лиценз бий. Үүний 14 талбайд нь сонгон шалгаруулалт зарлаад байгаа. Уг талбайн сонгон шалгаруулалтад  хэдэн компани оролцож байна вэ?
-Өмнө нь тухайн талбайд лиценз эзэмшиж байсан компаниуд сонгон шалгаруулалтад орж байгаа. Үүнээс гадна миний авсан мэдээллээр 10 гаруй компани сонгон шалгаруулалтад одоогоор оролцож материалаа өгсөн гэсэн. Сонгон шалгаруулалтад оролцогчдын материалыг 30 хоногийн хугацаанд хүлээж авах учиртай. Тэгээд энэ сарын 22-ны өдөр эцсийн дүн нь гарна. Дээрх 14 талбайд лиценз  эзэмшиж байсан аж ахуйн нэгж босго үнэ төлөхгүйгээр сонгон шалгаруулалтад оролцох давуу эрхтэй. Хэрэв сонгон шалгаруулалтад тэнцээгүй бол ялсан компанийн босго үнэд төлсөн төлбөрийг нөхөн олговороор авч хохирлоо барагдуулна.

-Нийт нутгийн 19  хувьд нь лиценз олгох боллоо. Энэ талбайд нийт хэдэн лиценз олгох төлөв байна вэ?
-Тоог нь одоо хэлэх боломжгүй. Учир нь Ашигт малтмалын шинэчлэгдсэн хуульд хайгуулын нэг лицензийн талбайг 25-150 мянган га байхаар заасан юм. Тэгэхээр хамгийн бага талбайгаар нь тооцвол маш олон, их хэмжээгээр нь үзвэл цөөхөн  лиценз олгоно. Дунджаар нэг компанийн эзэмших талбай 3-4 мянган га гэж үзвэл 1000 гаруй лиценз олгох   тооцоо бий. Гэхдээ энэ нь хайгуулын лиценз эзэмшихээр өргөдөл гаргаж буй компаниудаас шалтгаална. Зарим талбайд нь хайгуулын тусгай зөвшөөрөл авахгүй ч байж болно.

-Сонгон шалгаруулалт зарлах талбайн талаар тодруулж өгөөч?
-Нийт нутаг дэвсгэрийн 6.49 хувьд сонгон шалгаруулат зарлаж хайгуулын лиценз олгоно. Энэ талбайд улсын төсвийн хөрөнгөөр хайгуул хийсэн юм. Тэгээд ашигт малтмалын тодорхой илэрц буйг тогтоосон. Иймд нэмэлт хайгуул хийх шаардлага бий.