Багануур дүүргийн Засаг даргын орлогч Г.Цамбагараваас өвлийн бэлтгэлээ хэрхэн базааж буй талаар тодрууллаа.

-Дүүргийн хэмжээнд өв­лийн бэлтгэлээ хэр хангаж байна вэ?
-Багануур дүүрэг 30 гаруй мянган хүн амтай. Энэ сарын 1-ний байдлаар өвлийн бэлтгэлээ 95 хувиар хангаад байна. Албан байгууллагууд дулаанаа авсан. Одоо дулааны горим тохируулах  ажил хийж байна. Горимоо тохируулчихвал өвлийн бэлтгэлээ бүрэн хангасан гэж үзэж болно.

-Багануурын дулааны станцад засвар үйлчилгээ нэлээд хийх шаардлагатай гэдэг. Мөн нүүрсний уурхайд төлөх өрийн асуудлыг яаж шийдэж байна вэ?
-Багануур дүүрэг хоёр ч удаа хөлдсөн. Үүнээс хойш дулаа­ны станцын урсгал засварыг сүүлийн хоёр жилд хийлээ. Дулааны цахилгаан станц “Багануур” ХК-иас нүүрсээ авдаг.  Гэтэл уурхайд төлөх  өр нэмэгдсэн.  Одоогоор 2.5 тэрбум төгрөгийн өртэй. Энэ жилээс дулааны станцад нүүрс нийлүүлэхгүй гэсэн асуудал гарч байна.

-Өвөл хаяанд ирлээ. Нүүрс­гүй бол дулаацахгүй. Энэ асуудлыг хэрхэн шийдэж байна вэ?
-Бид уурхайгаас нүүрс авахгүй л бол өвөлжихөд бэрх болсон талаар Төрийн өмчийн хороо, холбогдох яамдад мэдэгдсэн. Багануурын дулааны станц одоогоор  800 гаруй сая төгрөгийн алдагдалтай ажиллаж байна. Улс алдагдлыг нөхөх мөнгө өгнө гэсэн ч одоо болтол шийд ирээгүй. Энэ жилээс ус, цахилгаан, нүүрсний үнэ өссөн.  Гэтэл дулааны үнэ нэмэгдээгүй. Иймд дулааны станцын алдаг­дал өсч байгаа юм. Оны эцэст алдагдал нь нэг тэрбум давах байх. Өмнө нь ч дулааны станц алдагдалтай ажиллаж ирсэн.

-Багануурын уурхай орон нутгийн өмнө хүлээсэн  нийг­мийн хариуцлагаа хэрхэн биелүүлж байна вэ?
-Уурхай нийгмийн хариуц­лагаа биелүүлж дэмжиж ажилладаг. Жишээлбэл, манай дүүргийн гэр хороололд 4000 өрх бий. Тэгээд 32 цэгээр дамжуулж нүүрс борлуулдаг. Бид Багануурын уурхайгаас 30 хувийн хямдралтай үнээр нүүрс авч нийлүүлэх гэрээ хэлцэл хийж байна.