Худалдаанд гараад сар ч болоогүй байгаа iPhone 6 болон 6 Plus утас тахийж мурийн хэлбэрээ алдаж байгаа тухай шуугиан гараад удаагүй байтал өөр нэг гомдол iPhone хэрэглэгчдээс гарах болжээ. Шинээр гарсан iPhone утсаар удаан ярих үед нүүрний шил болон хөнгөн цагаан гадаргуу хоёрын уулзвар дахь нарийхан зураас нь хүмүүсийн шанааны болон сахлын үсийг суга татаж өвтгөөд байгаа тухай нэг биш гомдол ирсэн байна. Ийм явдал өөрт нь тохиолдсон тухай хэд хэдэн хүн Твиттер хуудсандаа бичжээ. Энэ мэдээлэл олон нийтийн сүлжээнд даруй хүчээ авч, хошигнох дуртай хүмүүс iPhone 6 сахлын машины үүргийг ч давхар гүйцэтгэх хэмнэлттэй эд юм хэмээн хуурамч сурталчилгааны постер хүртэл хийгээд амжжээ.