Экспортыг нэмэгдүүлж, импорт орлох үйлдвэрийн төсөлд шалгаран "Чингис" бондын хөрөнгөөс хоёр тэрбум төгрөгийн санхүүжилт авсан гутлын үйлдвэр өнөөдөр нээлтээ хийлээ.

2011 онд 4 хүний бүрэлдэхүүнтэй байгуулагдсан "Best shoes" компани өмнө нь сард 60-70 хос гутал үйлдвэрлэж байсан бол өдөрт 500-800 хос гутал хийх хүчин чадалтай үйлдвэрээ ашиглалтад оруулав. 70 гаруй ажилтантай тус үйлдвэр Итали, Германы хамгийн сүүлийн үеийн тоног төхөөрөмжөөр тоноглогджээ.

"Бид 1134 ам.метр талбайтай шинэ байрандаа конверийн шугамаар үйлдвэрлэл явуулж эхэлснээр дотоодын гутлын зах зээлийн 30 хувийг хангаж чадахаар боллоо" гэж үйлдвэрийн захирал Б.Түвдэнням хэллээ. Анх гэрийнхээ тагтан дээр гутал хийж эхэлсэн Б.Түвдэнням орчин үеийн томоохон үйлдвэртэй болтлоо цуцалтгүй хөдөлмөрлөсөн бөгөөд түүний цаашдын зорилго нь өөрийн үйлдвэрийн бүтээгдэхүүнээ дэлхийн брэнд болгох, ажиллагсдаа сэтгэл хангалуун амьдруулж, эх орондоо сайхан амьдрах нөхцөл бүрдүүлэх явдал гэлээ.

"Хамгийн сайн чанарын гутлыг монголчууд дотооддоо үйлдвэрлэж чаддаг боллоо. Одоо бие биенээ дэмжих нь чухал. Хууль зүй, батлан хамгаалах салбарынхан ажлын гутлаа гадаадаас биш эл компаниас авдаг болох хэрэгтэй" гэж Ерөнхий сайд Н.Алтанхуяг үйлдвэрийн нээлтэд оролцохдоо онцлов

 "Best shoes" компани гутлаас гадна цүнх, арьсан жижиг эдлэлийг Итали, Герман, Энэтхэг зэрэг улсын лицензээр БНХАУ-д боловсруулсан зориулалтын үхэр, тугалын арьсаар хийдэг байна.