Сансрын аялал жуулчлалыг хөгжүүлж, хөх огторгуйн алс хязгаарт хүн төрөлхтний нэг хэсгийг аялуулна хэмээн амлаж буй “Virgin Galactic” компанийн нэг хөлөг өнгөрсөн баасан гарагт осолдсон явдал сансрын аялал жуулчлал аюулгүй байж чадах уу гэдэг асуулт дагуулаад байна. 2015 оноос сансарт аялуулна хэмээн 700 гаруй хүнээс захиалга аваад байгаа тус компанийн хоёрдугаар сансрын хөлөг нь анхныхаа туршилтын нислэгийн үеэр осолдож, нэг нисэгч нь нас барсан юм. Хөлөг чухам юунаас болж осолдсон шалтгааныг олж тогтоогоогүй байгаа бөгөөд үүнийг илрүүлэхэд нэлээд цаг хугацаа шаардлагатай бололтой. Гэхдээ 700 хүнээс тус бүр нь 250 мянган ам.долларын захиалга авчихаад байгаа “Virgin Galactic” компани үйлчлүүлэгчдийнхээ итгэлийг эвдэхээс эмээж, тус компанийн хувьд аюулгүй байдал эн тэргүүний асуудал хэмээн  мэдэгджээ. Аюулгүй байдлыг нэн тэргүүнд авч үздэг компанийн хувьд  осол юунаас болсныг нарийн судалж байж тогтооно гээд урьд өмнө хэрэглэж байгаагүй шатахуун ашигласан гэдэг шүүмжлэлийн хариуд өмнө нь өргөн хэмжээний судалгаа, туршилт хийсний үндсэн дээр нислэгтээ ашигласан гэж мэдэгдсэн байна.
Тэрбумтан Ричард Брэнсоны “Virgin Galactic” компани 2015 оноос сансрын аялал жуулчлалаа эхлүүлэхээр төлөвлөж байгаа юм.