Япон Улсаас Монгол Улсад суугаа Онц бөгөөд Бүрэн эрхт Элчин сайд Такэнори Шимизү МУГЖ дуучин Д.Оюунтүлхүүрт өргөмжлөл гардуулав.

Уг өргөмжлөлийг энэ сарын 1-ний өдөр болсон “Хайрын эгшиг” бие даасан тоглолтынх нь үеэр гардуулсан юм.

МУГЖ Д.Оюунтүлхүүр нь 1990 онд мэргэжлийн уран бүтээлчийн гараагаа Япон улсаас эхэлжээ. Японы цагаан сарын битүүний үдэш NHK телевизийн зохион байгуулдаг урлагийн оддын тоглолтод оролцож байсан цорын ганц Монгол хүн билээ. 1996 оны нийгмийн хямралын үед “Оюунтүлхүүр сан” -гаас япон хүмүүсийн дэмжлэгтэйгээр өнчин болон өвчтэй хүүхдүүдэд тусламжийн гараа сунгасаар ирсэн. Мөн Японы зүүн хойд бүс нутагт болсон байгалийн гамшигт нэрвэгдсэн хүүхэд залуусыг Монголдоо урьж сэтгэл санааны дэмжлэг үзүүлэх, Хоёр оронд соёлын харилцааны арга хэмжээ зохион байгуулах  зэргээр Монгол, Япон улсын хооронд гүүр болж  харилцан ойлголцлыг  нэмэгдүүлэхэд хүчин зүтгэж ирсэн билээ.