Олон улсын таеквондогийн дэлхийн хошой аварга, энэ жилийн мөнгөн медальт тамирчин С.Эрдэнэтэй цөөн хором ярилцлаа.

-Таеквондогийн дэлхийн аваргаас мөнгөн медальтай ирсэнд баяр хүргэе?
-Баярлалаа. 1993 оноос хойш олон улсын таеквондогоор хичээллэж байна. Энэ хугацаанд улс хотын тэмцээнүүдэд долоон удаа аваргалж байсан. Азийн аваргаас мөнгө, хүрэл, дэлхийн цомын аваргаас хүрэл медальтай ирж байлаа. Мөн хоёр удаа дэлхийн аварга болж байсан. Энэ удаа дэлхийн аваргаас мөнгөн медаль хүртлээ.

-Өнгөрсөн жил дэлхийн аваргад хоёр төрлөөр оролцоод хоёр алттай ирж байсан. Энэ удаа хэдэн төрлөөр оролцсон бэ?
-Өнгөрсөн жил тулаан, тулийн төрлөөр оролцсон бол энэ удаа зөвхөн тулааны төрлөөр оролцлоо. Бид зардлаа өөрсдөө дааж явдаг учраас ганцаараа явсан. Хэрэв зардлын мөнгөтэй бол явах олон тамирчин бий.

-Энэ удаагийн дэлхийн аваргын сониноосоо яриач. Хамгийн хүчтэй өрсөлдөгч аль улсын тамирчин байв?
-Ямар ч тэмцээнд зардал мөнгөндөө захирагдаад ганцаараа явах хэрэг гардаг. Өнгөрсөн жил хоёр ч алтан медаль авчихаад бараг зураггүй ирсэн. Зураг авч өгөх хүн ч байгаагүй учраас. Энэ жилийн дэлхийн аварга Италийн Марина де Карара хотод боллоо. Дэлхийн 110 гаруй орны тамирчин оролцсон. Тэмцээний нээлтэд Монголын “Эгшиглэн” гээд морин хуур, хөөмэйн хамтлаг тоглож таарсан. Тэд надад их тусалсан. Мөн Итали дахь консул Гантуяа гэж хүн байдаг. Жил бүр намайг тэмцээнд очихоор тосч аваад, тэнд байгаа монгол оюутнуудыг цуглуулаад жижиг хүлээн авалт зохион байгуулдаг. Ер нь, Италид очоод зочид буудалд байрладаггүй. Оюутнуудтай хамт байрлаад л тэмцээндээ орчихдог. Жил бүр Испаний тамирчид хүчтэй өрсөлдөгч болдог.

-Та таеквондогоор хичээллэхийн хажуугаар ажил төрөл хийдэг үү?
-3-6 насны хүүхдүүдэд таеквондогийн хичээл заадаг. Сүүлийн жилүүдэд тулааны болоод бие хамгаалах урлагуудаас Монголд эрчимтэй хөгжиж байгаа нь олон улсын таеквондо. Миний багшилдаг “Шинэ гэр” цэцэрлэгийн бүх хүүхэд таеквондогоор хичээллэдэг.

-Олимпод ороогүй төрлөөр манайхан хичнээн амжилт гаргасан ч үнэлэх нь тааруу. Үүнд сэтгэл эмзэглэх үе байдаг уу?
-Хойд Солонгос, өмнөд Солонгос хоёр нэгэнт нэгдэхгүй учраас гомдоллоод суух аргагүй л дээ. Хоёр Солонгос хуваагдахдаа урлаг, соёлоо хүртэл хуваагаад авчихсан. Өмнөд Солонгос нь дэлхийн таеквондог хөгжүүлээд олимпын төрөлд оруулчихсан бол олон улсын таеквондогийн хамгийн том тэмцээн нь дэлхийн аварга. Манайхан дэлхийн таеквондогоос дэлхийн аваргын ч медальгүй.

-Цаашид дэлхийн аваргын хэдэн тэмцээнд оролцоно гэж бодож байна вэ?
-Ирэх жилээс ахмадын төрөлд багтах учраас энэ жил ганцаараа ч хамаагүй гээд явлаа. Гэр бүлийн хүн маань олон улсад багшлах, шүүх эрхтэй тамирчин л даа. Жил бүр ээлжилж дэлхийн аваргад явахгүй бол санхүү хэцүү. Сүүлийн жилүүдэд би л явсан байгаа.