Их майдар төслөөс санаачлан Бурхан багшийн "Эхийнхээ ачийг хариулсан их дүйчэн өдөр"-т зориулан "1000 ээжийг баярлуулах 1000 захианы аян" өрнүүлсэн байна.

Энэ санаачилгаар хүүхэд, залуусын ээждээ бичсэн захиаг Чингисийн талбай дахь Их майдар төслийн байр болон  МБШТ-ийн Гандан тэгчэнлин хийд, Жавзандамба хутагт төв, ОХУ-ын Буддыст нийгэмлэг, Гүнчав Жамбаалин Асрал төв, Таны буянд даган баясъя төв, Лавайн эгшиг студи хамтран иргэд, хүүхэд, залууст тараасан юм. Хүүхэд, залууст эх үрийн нандин холбоо, гэр бүлийн халуун дотно харилцааг төлөвшүүлэх зорилготой чин сэтгэлийн захиа бичүүлж, ээжүүдэд хүргүүлснээс гадна үнэ төлбөргүй лекц зохион байгуулжээ. Энэ аянаар Анхдугаар богд өндөр гэгээн Занабазарын 17 дугаар зуунд бүтээсэн Майдар бурханы 72 см дүрийг  75 дахин томруулан 108 м өндөр суварга болгон босгож буй их бүтээн байгуулалтын сурталчилгааг бас хийж, хандивын өргөл авч буй явцаасаа танилцуулсан байна.

Төв аймгийн Сэргэлэн сумын нутаг Зүрх хайрхан уулын энгэрт цогцлоон босгож буй барилгын явц одоогоор 35 хувьтай үргэлжилж байна.