Өнгөрсөн амралтын өдөр болсон 65 дахь удаагийн Берлинийн олон улсын кино наадмын шилдэг киногоор Иранийн "Такси" кино шалгаран "Алтан баавгай" хүртжээ.

Ираны найруулагч Жафар Панахи Тегараны энхэл донхол замтай, өнгө алагласан гудамжаар өөрөө такси жолоодон явж, үйлчлүүлэгчидтэйгээ нийгэмд тулгамдсан асуудлаар санаа бодлоо солилцож, ярилцаж байгаа тухай уг кинонд гардаг аж.

Тус улсын нөлөө бүхий кино найруулагч Жафар Панахи нь олон улсын кино шүүмжлэгчдэд хэдийн хүлээн зөвшөөрөгдсөн бөгөөд 2000 онд Венецийн кино наадмын тэргүүн шагнал болох "Алтан арслан"-г, 2006 болон 2013 онд Берлинийн кино наадамд хоёрдугаар байр эзлэн "Мөнгөн баавгай" шагнал хүртэж байжээ.

65 дахь удаагийн Берлиний олон улсын кино наадмын "Алтан байвгай"-н төлөө 19 кино өрсөлдсөн байна.