Нью-Йоркийн Бруклин районд нэгэн ер бусын цэцэрлэг  үүдээ нээж анхны зургаан хүмүүжигчээ хүлээн авчээ. Энэ цэцэрлэгт бяцхан охид хөвгүүд биш насанд хүрсэн жирийн хүмүүс явах гэнэ. Анхны хүмүүжигчээр  нь л гэхэд зохиолч, хуульч, программ зохиогчид иржээ. Цэцэрлэг байгуулагчийн хэлж байгаагаар бол энэ ер бусын цэцэрлэгт мартагдаад олон жил болж байгаа хүүхэд насаа эргэн дурсах, зарим нь бол зүгээр л цагийг зугаатай өнгөрүүлэх зорилгоор ирэх гэнэ. Ингэснээр хүн өөртөө итгэлтэй болж, амьдралд буурьтай хандах ач холбогдолтой   ч гэж үзэж байна.
Энэ цэцэрлэгийн “багачууд” ерийн л нэг цэцэрлэг шиг долоо хоногт нэг удаа хичээл хийж, өдөртөө тоглож, зураг зурж, баримлын шавраар элдэв дүрс хийн, бас нэг цаг унтана.  Заримдаа хүмүүжүүлэгч нартайгаа хамт хотоор зугаална. Бас эцэг эхийн хурал болж үүнд хэнийг ирүүлэхээ “хүүхэд” өөрөө сонгоно.
Энэ цэцэрлэгийн төлбөр харьцангуй өндөр. Хүмүүжигч “хүүхдийн” төлбөрийн чадвараас шалтгаалан хамгийн бага нь 333 доллар бол хамгийн ихдээ 999 доллар байх юм байна.