Монголын мөсний загасчлалын холбоо /ММЗХ/-ны гишүүн, таван тамирчин энэ сарын 23-29-нд Финландын Куопио хотноо зохион байгуулах 12 дугаар ДАШТ-д оролцохоор тус улсыг зорьсон.

Одоогоос гурван жилийн өмнө байгуулагдсан ММЗХ нь өнгөрсөн оны сүүлчээр МҮОХ-ны гишүүнээр элссэн юм. Манай мөсний загасчлалын тамирчид анх удаа 2013 онд АНУ-д болсон ДАШТ оролцож наймдугаар байр эзэлж байсан бөгөөд 2014 онд Белорусьт болсон ДАШТ-д оролцсон туршлагатай юм. Энэ удаагийн ДАШТ-д оролцох баг тамирчид өнгөрсөн оны 11 дүгээр сараас бэлтгэлдээ гарсан. Тэд ихэвчлэн Тавантолгойн нууранд бэлтгэлээ базаасан байна.

Финланд улсад болох энэ удаагийн ДАШТ-д 14 орны баг тамирчид өрсөлдөж байгаагаас Ази тивээс Казахстан, Монгол Улсын баг тамирчид ур чадвараа сорьж байна.