Дуучин Б.Маралжингоо 2008 онд гаргасан “Миний ертөнцийн зүүд” цомгоороо сонсогчдод танигдсан билээ. Гэсэн ч тэрээр сүүлийн үед шинэ уран бүтээл тоотой гаргаж, сонсогчдод битүүхэн хүлээлт үүсгээд байгаа. “B” продакшинтай хамтын ажиллагаагаа дуусгавар болгосон тэрээр 2012 оноос ая зохиогч, продюсер Ганг болон дуучин Daisy нартай хамтран ажиллах болсон юм. Тэгвэл хамтын ажиллагааны үр дүнгээ удахгүй сонсогчдодоо хүргэхээр болж, долоон дуутай шинэхэн цомгоо энэ хавартаа багтаад өлгийднө гэдгээ амлалаа.
Хамгийн сүүлд “Өөрийнхөө зүгт” дуугаа гаргасан тэрээр цомогт багтсан бүх дуугаа дүрсжүүлсний дараа бие даасан тоглолт хийхээр болжээ. Энэ талаараа “Би ямар нэг улирлыг хөгжмөөр төсөөлөх дуртай. Өнгөрсөн зуныг дурсахаар ихэвчлэн хуучны дуу санаанд ордог. Учир нь би аавтайгаа хөдөө амарсан юм. Аав маань The Doors, Pink Floyd хамтлагийн хуучны дуунуудыг сонсдог. Зөөлөн салхи, ногооны үнэр, аавын яриа, хуучны дуу сайхан зохицол байгаа биз. Харин энэ удаа хүмүүс миний шинэ цомгийн дууг сонсоод хаврын улирлыг төсөөлж байгаасай гэж хүсч байна. Тоглолтоо бас дулаан улиралд хийнэ” гэжээ.