Энэ оны наймдугаар сарын 10-15-нд Тувагийн нийслэл Кызылд  болох “Хөөмий Азийн төвд” олон улсын наадмын бүртгэл эхэлсэн байна. ОХУ-ын Тува улсын Соёлын яамны мэдэгдсэнээр бол энэ наадмын хүрээнд шилдэг хөөмийчийг шалгаруулан төрийн тэргүүн нь шагнал гардуулах юм байна. Гоцлол, хамтлаг, орчин үеийн урлагтай хөөмий гэсэн гурван төрлөөр зохиогдох энэ наадамд зөвхөн тувачууд төдийгүй хөөмийн өлгий нутаг Монгол, дэлхийн бусад орнуудын ардын уран бүтээлчид оролцоно гэж хүлээж байгаа юм.
Тува жил бүр “Хөөмий бол төв Азийн ард түмний өв соёл” гэдэг симпозиум зохион байгуулж олон орны эрдэмтэн судлаач, урлагийн авьяастнуудыг уулзуулдаг уламжлалтай юм. Энэ симпозиумд Хятад,  Монгол, АНУ, Япон, Турк, Норвеги, Их Британии, Франц, Герман, Бразил, Испан, Грек, Унгар, Финлянд, Австрали болон бусад орныхон ирдэг байна.