ОХУ-ын нийслэл Москва орчмын Шатура хотын нэгэн дунд сургуулийн хөгжмийн багш 52 настай эмэгтэй нэгэн сурагчаа алуулахаар бэлтгэж байсан нь илэрч цагдаагийнхан саатуулсан байна. Багш эмэгтэй 15 настай нэгэн сурагчтайгаа бэлгийн харьцаатай байгаад, тэр нь түүнээс хөндийрч эхэлсэн болохоор хардсандаа ийн шийтгэхээр шийдсэн байна. “Сурагч нь холбоогоо таслан ангийнхаа нэг хүүхдэд хайртай болсон гэнэ. Харин багш эмэгтэй үүнийг тэвчсэнгүй, сурагчаа алахаар шийджээ” хэмээн эх сурвалж ярьжээ.

Түүний энэ явдлыг нэгэн танил нь мэдэж цагдаад мэдэгдсэнээр цагдаагийн ажилтан “алуурчин” болж очин ярилцаж бүхий л учрыг мэдээд саатуулсан байна. Эмэгтэй ”нууц амраг” сурагчаа алуулах хөлсөнд 100 мянган рубль амлажээ.
“Дөрөвдүгээр сарын 7-нд цагдаагийн ажилтан “алуурчны” дүрээр очиж багш эмэгтэй үнэхээр сурагчаа алуулахаар захиалсныг мэдэж баривчилсан. Тэрээр алуурчинд захиалгаа өгч, мөнгөө төлсөн” гэж Шатурын цагдаагийн хэлтсийн албан мэдээнд дурджээ.