Өнгөрсөн долоо хоногт  болсон ОХУ-ын ерөнхийлөгч Путины ард иргэдийн асуултад шууд хариулдаг телевизийн нэвтрүүлгийн  үеэр нэгэн сонин хүсэлт иржээ. Нэгэн эмэгтэй “Надад таньд тавих асуулт алга. Харин нэг хүсэлт байна. Миний найз эмэгтэй 40 нас хүрч байна. Тэр нохойд их хайртай. Бид түүнд нохой авч өгөхөд ч бэлэн байна. Гэтэл түүний нөхөр чөлөөнд гарсан хурандаа Борис үүнд дургүйцээд байх юм. Та Борис оо таны буруу гэж хэлээд өгөөч. Ерөнхий командлагчийн үгэнд орох байх” гэж ярьжээ.

ОХУ-ын Ерөнхийлөгч Владимир Путин хариуд нь “Би тушааж чадахгүй л дээ. Гэхдээ Борис оо, эелдэг бай. Эхнэрээ нохой худалдан авахыг нь зөвшөөр” гэж хэлжээ.
Үүний дараа Ростов хотын оршин суугч, чөлөөнд гарсан хурандаа Борис Фадеев эхнэр Еленагийнхаа төрсөн өдрөөр жижигхэн хав худалдан авч өгөөд Гошей хэмээн нэрлэсэн гэнэ. “Нөхөр маань Путины шууд нэвтрүүлгийг үзээд юу ч хэлээгүй. Харин хүүтэй минь хамт яваад захаас надад нохой худалдан авч өгсөн” гэж Елена бүсгүй “Говорит Москва” радио станцаар ярьжээ.