Nokia компани гар утасны зах зээлд 2016 он гэхэд эргэн ирнэ гэж учир мэдэх эх сурвалж хэлснийг хэвлэлүүд дамжууллаа. Хэвлэлийн мэдээлснээр бол энэ ажлыг Nokia Technologies нэртэй салбар гүйцэтгэх юм байна. Эднийд үүрэн телефоны технологитой холбоотой 10 мянга гаруй патент бий гэнэ.
Nokia Technologies өнөөдөртөө хятадын зах зээлд эрэлт ихтэй байгаа Nokia N1 планшет, андроид дээр суурилсан гар утасны программ гэсэн хоёр бүтээгдхүүн гаргаж байгаа ч энэ бол дөнгөж эхлэл гэж байна. “Тэд маш олон сонирхолтой зүйл боловсруулж байгаа. Компани зах зээлд хөлөө олно гэдэгт би бүрэн итгэлтэй байна” гэж Nokia-гийн дэд ерөнхийлөгч байсан Ричард Керрисийн хэлснийг Re/Code хэвлэл иш татжээ. Түүнийхээр бол эдний шинэ гар утас зах зээлд тэсрэлт болж, хэрэглэгчдийг байлдан дагуулах гэнэ.