Хэсэг хугацаагаар олгохгүй байсан  хайгуулын тусгай зөвшөөрлийг олгож эхэллээ.  Монгол Улсын нутаг дэвсгэрийн 19,9 хувь буюу 31 сая га талбайд ашигт малтмалын тусгай зөвшөөрөл олгохоор шийдвэрлэснээс 20,9 сая га талбайд өргөдлийн журмаар,  10,2 сая га талбайд сонгон шалгаруулалтын журмаар тусгай зөвшөөрөл олгох юм байна.  Ашигт малтмалын газар хайгуулын тусгай зөвшөөрөл авах хүсэлтээ ирүүлсэн 956 аж ахуйн нэгжийн өргөдлийг хянан шийдвэрлэсэн байна.  Кадастрын хэлтэс энэ оны 1 дүгээр сарын 26-аас эхлэн 16 удаа цахим хэлбэрээр 1686 дугаар олгож,  234 тусгай зөвшөөрөл олгохоор шийдвэрлэжээ. Энэ оны  нэгдүгээр сарын 1-ээс өнөөдрийг хүртэл тусгай зөвшөөрлийн төлбөр 13,2 тэрбум төгрөг, үйлчилгээний хөлсний төлбөр 510 сая төгрөг, хайгуулын тусгай зөвшөөрлийн эрх олгох үйлчилгээний хөлс 531 сая төгрөг, өргөдлийн дугаар олгох цахим системд нэвтрэх эрхийн төлбөр 748 сая төгрөгийг улсын төсөвт төвлөрүүлжээ. Шүүхийн шийдвэрээр тусгай зөвшөөрөл нь хүчингүй болсон ашигт малтмалын хайгуулын болон ашиглалтын 106 талбайд тусгай зөвшөөрөл олгох  журмын дагуу 6 удаа 50 талбайд сонгон шалгаруулалт зохион байгуулсан гэж Уул уурхайн сайд Р.Жигжид “Сайдын цаг” уулзалтын үеэр мэдэгдлээ.