Нийслэлийн Хан-Уул дүүргийн 4, 11 дүгээр хорооны нутаг дэвсгэр Зайсан, Арцатын аманд 1960-аад оноос хойш амьдарсан уугуул иргэдэд БОНХАЖ-ын сайд Д.Оюунхорол өнөөдөр таван жилийн хугацаатай газар ашиглалтын гэрчилгээ гардууллаа.

Хан-Уул дүүргийн 4, 11 дүгээр хороо нь Богдхан уулын дархан цаазат газар нутгийн хязгаарлалтын бүсэд хамаардаг. Тиймээс тэнд суурьшсан иргэд газар өмчлөх битгий хэл, ашиглах эрхээ эдэлж чаддаггүй. Иймд газрын зөрчилгүй нийт 302 иргэнд газар ашиглах эрхийг эхний ээлжинд олгохоор шийдвэрлэж, өнөөдөр тэдгээрээс 27 иргэнд ашиглалтын гэрчилгээг нь гардуулав.

Тус дүүргийн 11 дүгээрр хорооны иргэн Д.Даваасүрэн, “Зайсангийн аманд 40 жил амьдарч байна. Газар ашиглах гэрчилгээгээ  10 гаруй жил хөөцөлдсөн ч эрх бүхий байгууллагууд шийдэж өгөхгүй өдийг хүрсэн. Энэ олон жил хөөцөлдөж чадаагүй гэрчилгээг зургаахан сарын дотор шийдэж өгсөнд маш их баяртай байна” гэв. Эдгээр иргэний газар ашиглалтын гэрчилгээг өмчлөх, эзэмших эрх болгох тал дээр УИХ-д хууль оруулах түвшинд хүртэл анхаарч ажиллана гэж албаны төлөөлөгчид хэллээ.