Өмнөговь аймгийн “Малчдын зөвлөгөөн 2015” арга хэмжээ өнөөдөр болж өндөрлөлөө. Хоёр жилд нэг удаа уламжлал болгон зохион байгуулдаг Малчдын зөвлөгөөнд 15 сумын 300 гаруй малчид оролцсон юм.

Малчдын зөвлөгөөнөөр “Мал аж ахуйн салбарын өнөөгийн байдал, цаашид баримтлах бодлого” сэдвээр аймгийн Засаг дарга Б.Бадраа илтгэл тавьсан бол зөвлөгөөнд оролцогчдод хандан УИХ-ын гишүүн Д.Бат-Эрдэнэ үг хэлсэн юм. Мөн 2012 оны Малчдын зөвлөгөөнөөс гарсан шийдвэрийн хэрэгжилтийг Хөгжлийн бодлогын хэлтсийн дарга Т.Дөлбаяр танилцуулж Малчдын эрүүл мэндийн байдал, цаашид анхаарах асуудлаар Эрүүл мэндийн газрын дарга Ч.Баяржаргал, Хүнс, Хөдөө аж ахуйн салбарын хөгжлийн хөтөлбөрийн төслийг ХХААГ-ын дарга Л.Цэцэг-Өлзий танилцуулсан юм. Мөн Малчдын зөвлөгөөнд “Оюутолгой” ХХК-иас Өмнөговь аймгийн мал аж ахуйн салбарт хэрэгжүүлж буй арга хэмжээ” сэдвээр илтгэл тавьлаа.

Малчдын зөвлөгөөнөөр малчид тулгамдаж байгаа асуудлаа хэлэлцсэн. Тухайлбал, Малчдын тэтгэврийн насыг наашлуулах, залуу малчдыг бодлогоор дэмжих, урамшуулал өгч байх, бэлчээр усны асуудлыг шийдвэрлэж гүний усыг хамгаалалтанд авах, нүүрсний шороон замаар авто машин зорчуулахгүй байх, малын тоонд биш чанарт анхаарах зэрэг олон асуулт, саналыг дэвшүүлж тавьсан юм. Малчдаас гарсан саналд харьяа агентлаг хэлтсийн дарга нар хариулт өгч цаашид хэрэгжүүлэх шаардлагатай санал хүсэлтийг хүлээн авсан байна.