Монголын драмын урлагийн хөгжилд үнэтэй хувь нэмэр оруулах нэгэн арга хэмжээ тун удахгүй болох гэж байгаа билээ. БСШУЯ, УДЭТ, ГХЯ-ны дэмжлэгтэйгээр “Монголын Моно жүжгийн төв”, “Dream Art” продакшны хамтран зохион байгуулж байгаа “Ялагчдын цуваа” Олон улсын фестивалийг угтан зохион байгуулсан “Ганц хүний жүжгийн анхдугаар уралдаан” амжилттай болж өнгөрлөө. Уралдаанд Эрдэнэт хотын ХЗТ-ын жүжигчин Г.Мишээл “Чаплинд нулимс бий юу” жүжгээр, Уран бүтээлийн “Гоо нэгдэл”-ийн жүжигчин Г.Туяа “Улаан дэнлүүт асар” жүжгээр, УДЭТ-ын жүжигчин Б.Одгэрэл Гётегийн Фауст жүжгээс сэдэвлэсэн “Book” жүжгээр, О.Оюун-Эрдэнэ “Цэцгэн байшин” жүжгээр оролцсоноос жүжигчин Б.Одгэрэл шүүгч нарын 100 хувийн саналаар тэргүүн байрыг эзлэж, Олон улсын фестивалийг хааж тоглох эрхийг авлаа.
Харин шүүгч нарын саналаар Эрдэнэтийн театрын залуу жүжигчин Г.Мишээлд уг фестивальд оролцож өөрийн бүтээлээ тоглох эрхийг нэмэлтээр олгосон юм. Залуу жүжигчний “Чаплинд нулимс бий юу“ жүжгийг урлагийн гавьяат зүтгэлтэн Б.Баатар ихэд онцлон олзуурхаж, өөрөө зөвлөхөөр нь ажиллан бэлтгэхээр “дааж” авсан нь залуу жүжигчинд томоохон боломжийг олгосон үйл явдал болов.