Эх орноо орхиж ОХУ-ын харьяат болон дуулиан болж байсан Францын нэрт жүжигчин Жерар Депардье одоо франц  дахь бүхий л өмч хөрөнгөө зарж борлуулаад Белорусьт очиж тариачдын дунд амьдрахаар болсон тухайгаа Le Figaro TV Magazine сэтгүүлд ярилцлага өгөхдөө мэдэгджээ.

“Одоохондоо би Италид амьдарч байна. Гэхдээ ойрын үед Беларусьт очиж тариачдын дунд амьдрахыг хүсч байна. Тэнд үнэхээр сайхан, ерөнхийлөгч нь ч бас сайхан хүн” гэж тэр хэлсэн байна.

Жүжигчин бас Франц улстай ямар нэг харилцаатай байхыг хүсэхгүй байна гээд “Би  эндэх бүх хөрөнгө, хувийн өмчөө зараад цаашид энэ улсын нэг хэсэг байхаа больж байна.  Францын татварын бодлого намайг бүр залхаасан” гэжээ.

“Би францчуудад хайртай. Харин би францын засгийн газарт дургүй. Франц руу би үе үе ирж байх болно, би чинь одоо чөлөөт хүн шүү дээ” гэж мэдэгджээ.

Депардье сар хагасын өмнө Белорусьт байж ерөнхийлөгч Лукашенкотой хэсэг хугацааг хамт өнгөрөөн өвс хадаж орос баннд орж байхдаа сэтгэл нь ихэд хөдөлсөн юм.