Монголын “топ” спортын төрлүүдийн нэг жүдо бөхийн ДАШТ өнгөрөгч долоо хоногт Казахстаны нийслэл Астанад зохион байгуулагдсан. Тэгвэл Дэлхийн бөхийн нэгдсэн холбооны насанд хүрэгчдийн ДАШТ АНУ-ын Невада мужийн Лас Вегас хотод болж байна. Энэ удаагийн тэмцээнд 120 гаруй орны 450 орчим тамирчин оролцож буй юм. ДАШТ-ий нээлт өчигдөр амжилттай болж, дэлхийн шилдгүүд “Рио-2016” олимпын наадмын эрхийн төлөө эхний сорилгодоо өрсөлдөж эхнээсээ эрхээ өвөртлөөд байна. Тодруулбал, 66 кг-ын жинд ХБНГУ-ын тамирчин Франк Штаблер алтан медаль хүртсэн бол БНСУ-ын тамирчин, дэлхийн аварга Хон Сю Рю мөнгөн медаль хүртсэн байна. Мөн энэ жинд ОХУ-ын тамирчин, Европын наадмын аварга Артем Сурков болон Сербийн тамирчин  Давор Стефанек нар хүрэл медаль хүртжээ.

Харин 75 кг-ын жинд ОХУ-ын тамирчин, олимпын аварга Роман Власов алт, Данийн тамирчин Марк Мадсен мөнгө, Казахстаны тамирчин  Досжан Картиков болон АНУ-ын тамирчин 3.Эндрю Бисек нар хүрэл медалийн эзэн боллоо. 98 кг-ын жинд барилдсан Армяны тамирчин, дэлхийн аварга Артур Алексанян  алт, Ираны тамирчин, ДАШТ-ий хүрэл медальт Гасим Резаи мөнгө, ОХУ-ын тамирчин, Европын наадмын аварга Ислам Магомедов болон Украины тамирчин  Дмитрий Тимченко  нар тус тус хүрэл медаль хүртсэн амжилт үзүүлжээ. Ийнхүү тэмцээний эхний өдөр ОХУ-ын гурван ч тамирчин олимпын эрхээ авлаа.